Хъодалаты Герсан,
ССРЦ æмæ РХИ Фысджытæ
æмæ журналистты Цæдисты уæнг,
журнал "Фидиуæг"-ы редактор
Æртындæс коммунары
(верлибр)
Згъудеры къуылдымыл
Сау ингæны риуæй
Урс обелиск,
Арты цæджындзау,
Арвмæ рæмудзы.
Арæх урс обелискæн
Йæ цъуппыл æрбады
Æмæ, хъарæггæнæгау,
Сау сынт фæуасы…
Рагæй ис ахæм æгъдау:
Амардис лæг, -
Ингæн ын ыскъахынц…
Уыдонæн та фыццаг…
Уыдонæн та фыццаг…
Ыскъахтой ингæн…
Ингæн, арф ингæн…
Уыдон фыдгулты æхстой
Æхсæз æмæ ссæдз
Судзгæ фыдæхæй
Ифтыгъд цæстæй…
Сæхи сын фыдгултæ æхстой
Æртындæс винтовкæйæ,
Хус топпыхосæй
Уыдысты кæй нæмгуытæ ифтыгъд…
Фæндыд ма хъайтарты,
Утæхсæнгæнгæйæ,
Сæ мадæлон зæххæн,
Сæ фыдæлон зæххæн
Фæстаджы хъæбыс ныккæнын, -
Нæ сын бантыст уый дæр:
Сæ къухтæ фæстæмæ
Уыдысты æфсæн цæгтæй баст…
Фæлæ уды фæдис-хъæрæн
Ныццауазæн, бабæттæн нæй.
Сæрибармæ сидæн,
Рæстдзинадмæ сидæн,
Цыргъ фæринчытау,
Мæрдон уæлдæф кодтой цъыччытæ.
Стæй рухсы къæсæрæй,
Сыгъдийы фæндагыл
Лæугæйæ, фæраст сты
Ирон сыджыты хъæбысмæ.
Сæ тугæрхæм риуты
Æбуалгъы судзгæ нæмгуытæ –
Иры низтæ ахастой…
Чизоны, уыдон тæригъæдæй
Уæлæ Бур хохы сæр
Адардта урс?
Чизоны, Згъудеры къуылдымæн
Й` алыварс адгуытæ нæй,
Фæлæ уыдон тæригъæдæй
Аскъуыдтæ зæхх?
Науæд, чизоны, саггомæй
Не згъоры къада æмуырдыг,
Фæлæ фæмæхсти зæххы цæссыг?
Кæд урс обелиск
Саубуар планетæйы
Урсытæй иу у?
Кæд, æнæбын космосы
Чи сныхсти фатау,
Уыцы æнæрцæф ракетæ
Урс обелискæн –
Йæ комкоммæ сих?
Афтæ у æви уфтæ –
Згъудеры къуылдымыл
Фæлмæст æмæ сæрыстырæй лæууы
Урс обелиск –
Æнусон, æнæнтау цырагъ.
Æмæ сырæзтис уый,
Æнæ дызæрдыгæй,
Æртындæс коммунары
Хъизæмаргæнæг ыстджытæй.
Мæ зæрдæйы та –
Æртындæс хъæдгомы,
Кæй нæ байгас кæндзæн æвдадз дæр.
Ирыстоны арвыл та
Æртындæс стъалыйы
Æнæныгуылгæ ´рттивынц.
1977 аз. |