ИРОН АДÆМ

Ирон адæм хъæбатыр ма кæд нæ уыд?
Цас федтой зынæвзарæн, фыдтухи?!
Нæ разылди куырой дæр ма сæ сæрыл,
Уый йедтæмæ цынæ федтой, цы нæ зын!

Се 'взагæн дæр раст афтæ уыд йæ хъысмæт,
Чысылгай йæ рох байдыдтой, хъыгагæн,
«Цæмæн хъæуы, кæйонг кусы, фæзæгъынц, -
Цы гæххæтт нæ бахъæудзæнис иронау?»

Сæфы, сæфы ирон æвзаг сындæггай,
Нæхæдæг дæр нал уыдзыстæм куыд адæм,
Цæмæн кæнæм фыдаудæн нæхиуыл
Фыдæлтæй нæм хуыздæр хæзна куынæ ис!

Иры дзыллæ, сидын уæм æз, сидын,
Сызмæлут, ысхæцут-ма уæхиуыл,
Æндзыг рæстæг аивгъуыдта, фæфæстæ,
Ног рæстдзинад махы онг дæр куы 'рхæццæ.

Иры дзыллæ, сидын уæм æз, сидын,
Ысдзурæм-ма не 'взагыл хъæрдæрæй,
Уадз фæхъусæд иууылдæр нæ хъуыды,
Не 'взаг кæй у нæ хæцæнгарз, нæ хотых.

Уадз фæхъуысæд дун-дунемæ се'ппæт,
Махмæ дæр кæй ис хорз фæтк æмæ æгъдæуттæ,
Махæн дæр кæй ис Къоста, Секъа, Цомахъ, Нигер,
Махæн дæр кæй ис «Нартæ», «Симд» æмæ æндæртæ.

Иры дзыллæ, сидын уæм æз, сидын,
Сызмæлут, ысхæцут ма уæхиуыл,
Сахуыр кæнæм, бакусæм ныр афтæ,
Адæмæн цæстæвæрæн куыд фæуæм!

15. 09. 89 аз

О, ацы сылгоймæгтæ!

О, ацы сылгоймæгтæ!
О, ацы уæздан удтæ!
Базонут уæ бынат-иу,
Базонут уæхи дарын.
Æркæсут уæхимæ-иу,
Æркæсут уæ цардмæ дæр,
Науæд цы уындзыстут?
Науæд кæй хъæудзыстут?
Уалдзыгон дидинау,
Рæсугъд куынæ уат-иу,
Æрттивгæ куынæ кæнат,
Уæд куыд хъуамæ уат?
Ут-иу хъæбатырдæр,
Сæрæндæр, куыстуарзагдæр,
Сабыр уæ ахастæй,
Уарзæг уæ зæрдæйæ!
Дарут бæрзонд уæхи,
Хæцут-иу уæ ныхыл дæр,
Ма кæнут былысчъилтæ —
Нæу уый лæджыхъæд, нæ.

12.03.89 аз

ХЪОДАЛАТЫ ГЕРСАНӔН
(Йӕ райгуырды 50 азы бонмӕ)

Прозӕйӕ фыст ӕмдзӕвгӕ

Герсан, хорз студент уыдтӕ.
Сабыр, ӕмбаргӕ ӕмӕ барон лӕппу.
Гӕппытӕ нӕ кодтай-иу иуӕй-иутау,
Уыйхыгъд-иу хъуыдыты ныгъуылдтӕ.

Дӕ хӕслӕвӕрдтӕ ӕххӕст кодтай,
Цӕсгомджын ӕмӕ  ӕнӕсымӕй.
Дӕ сӕр дын-иу куы фехӕлдтаин,
Уӕд  дӕр фӕстӕмӕ не сдзырдтаис.

Уый раджы уыди, раджы, мӕ хур.
Уӕдӕй бирӕ рӕстӕг рацыди.
Кӕддӕры ӕвзонг лӕппу–хъуыдыгӕнаг,
Абон хорз поэт рацыдис.

Дисӕндзуринаг алы ран
Дӕ курдиат нын куы фӕци,
Ӕмӕ, ӕцӕгдӕр, куыд хорз сты
Дӕ поэтикон уацмыстӕ!

Дӕ зӕрдӕйы бынӕй исгӕ сты
Де ‘гъуыстаг, аив ӕнкъарӕнтӕ.
Зӕрдӕмӕ афтӕ арф бахъарынц, –
Ӕмӕ ныл базыртӕ базайы…

Мӕнмӕ уӕлдай хуыздӕр фӕкасти,
Чысангомыл цы очерк ныффыстай,
Уыйас фарстытӕ дзы райхӕлдтай,
Омӕ сӕ куыд раст ӕмбарыс!

Дӕ фӕндзай азы дӕхирдыгӕй
Ӕрӕджы куы фесты, ӕмӕ нын рай.
Бауарздзӕнис дын мӕ цӕст –
Дыууӕ ахӕмы ма цы фӕцӕрай!

Ноджы-иу цырындӕр цы кӕна
Дӕ курдиат алхатт дӕр.
Нӕ иумӕйаг размӕцыдӕн-иу
Фӕндагамонӕг цы сгуыхай!

Бирӕ дын бантысӕд ноджыдӕр,
Макуы фӕкъуыхцы уӕт дӕ фыссӕн сис,
Дӕ нывӕзт ӕмдзӕвгӕты зӕлтӕ
Кӕддӕрид куыд агайой зӕрдӕ!

23/ XII, 1988 аз Цхинвал