26 Февраля 2024
"Надо любить и хранить те образцы русского языка, которые унаследовали мы от первоклассных мастеров". Д.А.Фурманов
Меню сайта
   Главная
   Новости
   Об АПРЯЛЮО
   Журнал, юбилеи
   Подшивка
   Конференции
   Семинары
   Конкурсы
   Международное
    сотрудничество
   Достижения студентов
    и школьников
   Методический уголок
   Литературная страничка
   Объявления
   О сайте
Поиск на сайте


Статистика


Куыдзойты Анжелӕ. Полипредикативон конструкциты аивгæнæн-нывæфтыд функцитæ Хетæгкаты Къостайы лирикæйы

Лирикон уацмысы синтаксисӕн ис йӕхи характерон миниуджытӕ. Фыццаджыдӕр, уый тырны конструкциты рог ӕмӕ рӕ- сугъддзинадмӕ, структурӕты хуымӕтӕгдзинадмӕ. Мидис аивдӕрӕй, ӕнкъарӕнджындӕрӕй раргом кӕныны тыххӕй арӕх пайда кӕны инверсийӕ, актуализацийы алы хуызтӕй, фӕлхаткӕнынадӕй, фарстон-дзуаппон, фӕдзӕхстон формӕтӕй ӕмæ ӕнд.

Экспрессивон синтаксисы мадзӕлттӕ - номхуындон, парцелляцигонд конструкцитӕ, ома, фрагментон структурӕтӕ - уацмысы ӕвзаг кӕнынц сӕрибар, рог, ӕнцонӕмбарӕн.

Афтӕмӕй ӕмдзӕвгӕйы синтаксисӕн, иумӕйагӕй, характерон сты, иуӕй, бӕрзонд патетикон конструкцитӕ (синтаксисон параллелизм, фӕлхаткӕнынады алы хуызтӕ), иннӕмӕй та - дзургӕ ныхасмӕ хӕстӕг конструкцитӕ (ӕнӕххӕст, дихгонд структурӕтӕ).

Лирикон уацмысы ӕвзагмӕ уӕлдай экспрессивондзинад бахӕссынц хъӕрон ӕмӕ фарстон хъуыдыйӕдтӕ, риторикон сидӕнтӕ, риторикон фӕрстытӕ ӕмæ ӕнд. Ӕнкъарӕнджын мадзӕлттыл нымад сты хайыгтӕ, ӕвастхъӕртӕ, хъуыдыйады структурон ӕнӕххӕстдзинад, фӕлхатгонд бӕттӕгтӕ, цухгонд бӕттӕгтӕ.

Ӕппӕт ацы мадзӕлттӕ реализацигонд цӕуынц, фыццаджыдӕр, хуымӕтӕг ӕмӕ элементарон вазыгджын (ома,  дыууӕ пре- дикативон хайӕ арӕзт) хъуыдыйӕдты. Кӕй зӕгъын ӕй хъӕуы, полипредикативон вазыгджын хъуыдыйӕдты къаддӕр фадӕттӕ нӕй экспресси равдисынӕн, фӕлӕ уыдон, фыццаг бакастӕй, сты лирикон уацмысы нӕ, фӕлӕ эпикон уацмысы ӕвзаджы атрибут. Ӕцӕгӕйдӕр, ӕртӕ-цыппар ӕмӕ фылдӕр предикативон хайӕ арӕзт структурӕтӕ хъуамӕ уӕззау, вазыгджын, зынӕмбарӕн кӕной ӕмдзӕвгӕйы ӕвзаг. Фӕлӕ, Хетӕгкаты Къостайы цалдӕр ӕмдзӕвгӕйы синтаксисмӕ ӕркӕсгӕйӕ, ӕрцыдыстӕм ӕндӕр хатдзӕгмӕ.

Къостайы сфӕлдыстадон бынтӕ цух не сты иртасӕгӕй. Критиктӕ, литературӕиртасджытӕ, лингвисттӕ се 'ргом здӕхтой ӕмӕ здахынц поэты уацмыстӕм, кӕнынц сын алывӕрсыг анализ [6]. Хицӕн зонадон уацты ӕмӕ сӕрмагонд монографиты алы- вӕрсыгӕй иртасынц поэты ӕмдзӕвгӕты лексикӕ, фразеологи, фӕлгонцты арӕзт [5] ӕмæ а. д. Фӕлӕ фаг хъусдард нӕй уацмысты синтаксисмӕ, кӕд аивадон фӕлгонцтӕ ӕмӕ ӕххӕст нывтӕ поэт хицӕн дзырдтӕ ӕмӕ дзырдбӕстыты фӕрцы нӕ аразы, фӕлӕ бӕлвырд синтаксисон конструкциты руаджы, уӕддӕр.

Ирон синтаксисы полипредикативон (бирӕхайон) вазыгджын хъуыдыйӕдты фарст лыггонд нӕ, фӕлӕ, зонады куыд ӕмбӕлы, афтӕ ӕвӕрд дӕр нӕма у. Сӕ экспрессивон функцитӕм ӕмӕ аивадон уацмысы сӕ пайдакӕнынмӕ та ӕппындӕр каст нӕма ӕрцыдис. Афтӕмӕй ацы конструкцитӕ сты цавӕрфӕнды уацмысы ӕвзаг ӕнкъарӕнджын кӕныны ахадгӕ мадзал.

Зӕгъӕм, Къостайы ӕмдзӕвгӕты, ӕнхъӕл куыд уыдыстӕм, уымӕй арӕхдӕр ӕмбӕлынц полипредикативон ӕнӕбӕттӕг вазыгджын хъуыдыйӕдтӕ (дарддӕр - ПӔВХъ).

Вазыгджын хъуыдыйады предикативон хӕйтты 'хсӕн бӕттӕгтӕ цухгонд куы цӕуой, уӕд конструкци вӕййы динамикон, амоны тагъд, ӕвиппайды архайдмӕ, иу фразӕйӕ ӕвдыст ӕрцӕуы ӕххӕст ныв. «Речь, не соединенная союзами, имеет некоторую особенность: в один и тот же промежуток времени сказано, по-видимому, многое, потому что соединенное посредством союзов делает многое чем-то единым, а с уничтожением союзов, очевидно, единое, напротив, делается многим», - фыста Аристотель [1 : 389].

Къостайы ӕмдзӕвгӕты ӕмбӕлынц ПӔВХъ цалдӕр структурон хуызы:

I. Полипредикативон ӕнӕбӕттӕг вазыгджын хъуыдыйӕдтӕ бастдзинады иу хуызимӕ (ома, компонентты ӕхсӕн дӕр ӕмӕ сӕ аразӕг предикативон иуӕгты ӕхсӕн дӕр ис ӕрмӕст ӕнӕбӕттӕг бастдзинад):

1) иу вазыгджын компонент баст у хуымӕтӕг компонентимӕ:

[(Ӕз топпӕй нӕ хъазын), (Ӕз барӕг нӕ дӕн)]: [Ӕхсаргард ысласын Мӕ бон нӕу мӕнӕн] [8:13].

Ацы ПӔВХъ у полисемантикон (йӕ хӕйттӕн ис алыхуызон грамматикон нысаниуджытӕ); ис дзы синтаксисон бастдзинады иу хуыз - ӕнӕбӕттӕг; дих кӕны дыууӕ компонентыл, уыимӕ фыц- цаг у вазыгджын компонент (арӕзт у дыууӕ предикативон иуӕгӕй - элементарон ӕнӕбӕттӕг вазыгджын хъуыдыйадӕй), дыккаг та - хуымӕтӕг компонент (иу предикативон иуӕгӕй арӕзт).

2) иу хуымӕтӕг компонент баст у вазыгджын компонентимӕ:

[Зымӕг нӕ хӕхты цух нӕ уадзы] - [(Лӕджы ӕмбӕрц ӕруары мит); (Ӕфцӕгӕй коммӕ уад дзыназы), (Их доныл саразы йӕ хид)] [8 : 23].

Зындгонд куыд у, афтӕмӕй пунктуацион нысан «стъӕлф къӕдзыгимӕ» ПӔВХъ февдисы компонентты дих, ома, ӕвӕрд вӕййы се 'хсӕн. Ацы скъуыддзаджы ӕрхӕцӕн нысӕнттӕм куы кӕсӕм, уӕд ӕй хъуамӕ адих кӕнӕм дыууӕ вазыгджын компонентыл, фӕлӕ цыппаррӕнхъоны мидис ахӕм бар нӕ дӕтты: фыццаг рӕнхъ (хуымӕтӕг предикативон иуӕг) у тезис, иннӕ ӕртӕ хуымӕтӕг предикативон иуӕджы йын ӕргом кӕнынц йӕ мидис, аразынц ӕххӕст, тыхджын ӕнкъарӕнджын ныв: [Зымӕг нӕ хӕхты цух нӕ уадзы] : [(Лӕджы ӕмбӕрц ӕруары мит), (Ӕфцӕгӕй коммӕ уад дзыназы), (Их доныл саразы йӕ хид)].

Поэты лирикӕйӕн характерон сты ахӕм арӕзтытӕ: тезис - цалдӕр хуымӕтӕг предикативон иуӕгӕй арӕзт аргумент:

[Нӕй кад мӕгуыр лӕгӕн йӕ куыстӕн]: [(Йӕ сихор, йе 'хсӕвӕр - йӕ мӕт), (Йӕ уат - ыскъӕт, зыгуым - йӕ лыстӕн), (Хъӕбӕр - йӕ цъӕх хуыссӕн нымӕт)] [8: 23].

[Дӕ номыл, дӕ кадыл Нӕ барын мӕхи]: [(Ныууадз мӕ мӕ адыл), - (Фӕндон хорз кӕм и?!)] [8:13].

3) ПӔВХъ арӕзт у дыууӕ вазыгджын компонентӕй:

[(Мыггагӕй мӕ ма фӕрс), - (Уӕздан лӕг нӕ дӕн)] : [(Мӕ уындмӕ мын ма кӕс), - (Нӕ бӕззын чызгӕн)] [8 : 39].

Предикативон иуӕгты ӕнӕбӕттӕг бастдзинад ӕххуыс у архӕйдтыты, уавӕрты ӕнӕххӕстдзинад, «ӕнӕфӕуддзинад» равдисынӕн. Фӕлӕ ӕппӕт ацы хъуыдыйӕдтӕ ӕнкъарӕнджын кӕны ӕрмӕст бӕттӕгты цух нӕ, фӕлӕ ма ӕндӕр мадзӕлтты пайдакӕнынад дӕр: синтаксисон параллелизм, предикативон иуӕгты структурон ӕнӕххӕстдзинад (хъуыдыйады уӕнгты цух), риторикон фарст, предикативон иуӕгтӕ - ӕппӕрццӕг хъуыдыйӕдтӕ.

II. ПӔВХъ бастдзинады цалдӕр хуызимӕ: сӕйраг дихдзинады ӕмвӕзыл (компонентты 'хсӕн) ис ӕнӕбӕттӕг бастдзинад, сӕ аразӕг предикативон хӕйтты 'хсӕн та - бастдзинады ӕндӕр хуыз:

  1. дыууӕ вазыгджын компоненты мидӕг предикативон иуӕгтӕн ис домгӕ бастдзинад:

[(Ныббар мын), (кӕд-иу дӕм мӕ зарӕг Кӕуӕгау фӕкӕса, мыййаг)] : [(Кӕй зӕрдӕ нӕ агуры хъарӕг), (Уый зарӕд йӕхи фӕндиаг)] [8:11].

  1. дыууӕ вазыгджын компоненты мидӕг предикативон иуӕгтӕн ис ӕнӕбӕттӕг ӕмӕ домгӕ бастдзинад:

[(Рагӕй мын «ацу» дӕ цӕстӕнгас дзуры), (Рагӕй дӕ кодтон мӕ уындӕй тӕрсын)] : [Зонын, (дӕ зӕрдӕ куыд ризы мӕ цуры), хъусын ныр дӕр ма йӕ сусӕг хъӕрзын...] [8: 21].

  1. иу предикативон иуӕгӕй арӕзт хуымӕтӕг компонент ӕмӕ вазыгджын компонент (домгӕвазыгджын хъуыдыйад):

[Де 'мбал сӕ хорз зоны] : (Адон куыд фӕрӕзтой), [афтӕ сӕ тӕрхоны Архайдтой растыл!] [8 : 58].

[Бирӕ дӕ нал хъӕуы уырдыгӕй дзӕнӕтмӕ] : (Бӕхмӕ куы февзидай), - [Иу цӕсты тъӕбӕртмӕ Фестдзӕн дӕ разы] [8 : 58].

  1. вазыгджын компонент предикативон хӕйтты ӕнӕбӕттӕг бастдзинадимӕ ӕмӕ вазыгджын компонент предикативон хӕйтты бабӕтгӕ бастдзинадимӕ:

[(Чи дӕ йӕ мад хоны), (чи дӕ йӕ фыд хоны)]: [(Чи дзы бӕгъӕввад у), (чи та дзы ронбӕгъд у), (Чи та ӕнӕ худ)] [8 : 59].

  1. вазыгджын компонент предикативон иуӕгты домгӕ бастдзинадимӕ ӕмӕ вазыгджын компонент предикативон иуӕгты домгӕ ӕмӕ бабӕтгӕ бастдзинадимӕ:

[(...ам мӕ кӕм баййӕфтай), (Уым дын мӕ диссаг зӕгъдзынӕн)] : (Сихор мӕн у), (фӕлӕ ма йӕ куы радавон), - [Адджындӕрӕн ӕй хӕрдзынӕн] [8 : 72].

Ахӕм хъуыдыйӕдты экспресси фылдӕр кӕны сӕйраг хӕйтты ӕмахастон дзырдты - номивджыты цух дӕр: зонын, дӕ зӕрдӕ куыд ризы мӕ цуры, (уый); бӕхмӕ куы февзидай, (уӕд) иу цӕсты тъӕбӕртмӕ фестдзӕн дӕ разы.

Ӕнӕбӕттӕг ӕмӕ домгӕ бастдзинӕдтӕ цы полипредикативон вазыгджын хъуыдыйӕдты ис, уыдоны фӕрцы поэт ӕлвӕстӕй, иу хъуыдыйады мидӕг, ӕвдисы, ӕцӕгдзинады кӕрӕдзиимӕ ӕнгом баст чи у, къорд ахӕм фӕзынды.

III. Полипредикативон домгӕвазыгджын хъуыдыйӕдтӕ.

  1. ПДВХъ ӕмхуызон ӕмдомгӕ бастдзинадимӕ:

(Абон дын адӕм цы хорз ӕгъдӕуттӕ радтой), (Ацы дзыллӕ дыл цы цӕстысыг фӕкалдтой), [Уый дын ӕххуысаг!] [8 : 59].

  1. ПДВХъ уӕлӕмхӕст хайы «уӕрӕхдӕргонд функциимӕ» (иу уӕлӕмхӕст хай дыууӕ ӕмӕ фылдӕр сӕйраг хаимӕ):

(Ӕз дзыллӕйӕ къаддӕр куы дарин, Куы бафидин искуы мӕ хӕс), [Уӕд афтӕ ӕнкъардӕй нӕ зарин], [Нӕ хъуысид мӕ кӕуын хъӕлӕс] [8:11].

Куыд уынӕм, афтӕмӕй дыууӕ хъуыдыйады дӕр сты контаминацигонд структурӕтӕ, ома, синтаксисон бастдзинады иу хуызӕй фылдӕр кӕм ис, ахӕмтӕ (нӕ дӕнцӕгты - домгӕ ӕмӕ ӕнӕбӕттӕг бастдзинӕдтӕ). Зӕгъын хъӕуы уый, ӕмӕ нырыккон синтаксисы ахӕм хъуыдыйӕдты тыххӕй ис дыууӕ ныхмӕвӕрд цӕстӕнгасы. И. А. Василенко [4], Н. С. Валгина [2] ӕмӕ ӕнд. ПДВХъ ӕмхуызон ӕмдомгӕ уӕлӕмхӕст хӕйттимӕ хонынц ӕнӕконтаминацигонд структурӕтӕ, уынынц дзы домгӕ бастдзинады «сыгъдӕг» хуыз. Ахӕм хъуыдыимӕ сразы уӕвӕн ис, ӕнӕбӕттӕг бастдзинад синтаксисон бастдзинады хицӕн хуызыл нӕ нымайгӕйӕ. Фӕлӕ цы ахуыргӕндты кой кӕнӕм, уыдон вазыгджын хъуыдыйады сӕрмагонд хуызыл нымайынц ӕнӕбӕттӕг вазыгджын хъуыдыйад, ома иртасынц синтаксисон бастдзинады ӕртӕ хуызы: бабӕтгӕ, домгӕ ӕмӕ ӕнӕбӕттӕг. Ӕмӕ кӕд афтӕ у, уӕд хынцын хъӕуы, ӕмдомгӕ уӕлӕмхӕст хӕйттӕ кӕрӕдзиимӕ куыд баст сты (бабӕтгӕ кӕнӕ ӕнӕбӕттӕг бастдзинадӕй), уый дӕр. Ацы аргументы фарс ма дзуры ахӕм факт дӕр, ӕмӕ цалдӕр сӕйраг хаимӕ иу уӕлӕмхӕст хай баст цы хъуыдыйӕдты у, уыдон ацы автортӕ хонынц контаминацигонд структурӕтӕ (ома хынцынц сӕйраг хӕйтты ӕхсӕн бастдзинад). Е. Г. Усманова [6] ПДВХъ дыууӕ хуызы дӕр хоны ӕмхӕццӕ, ома, контаминацигонд структурӕтӕ.

Ӕнӕконтаминацигонд ПДВХъ-имӕ абаргӕйӕ (ӕрмӕст домгӕ бастдзинад кӕм ис, ахӕмтимӕ), ацы конструкцитӕ сты рогдӕр, нывӕфтыддӕр, ӕнкъарӕнджындӕр.

Цы ӕмдзӕвгӕты синтаксисмӕ ӕркастыстӕм, уыдоны арӕхдӕр ӕмбӕлынц полипредикативон ӕнӕбӕттӕг вазыгджын хъуыдыйӕдтӕ, уымӕн ӕмӕ, И. В. Варнавская куыд фыссы, афтӕмӕй: «Лаконичность формы ПБСП не допускает разрыва между частями, вносит момент неожиданности и быстрого следования событий, тем самым воздействуя на чувства и волю и объединяя коммуникативные задачи автора и читателя» [3 : 234].

Литературӕ

1. Аристотель. Риторика. М., 1961.

2. Валгина Н. С. Синтаксис современного русского языка. М., 1991.

3. Варнавская И. В. Полипредикативное бессоюзное сложное предложение как коммуникативная единица // Проблемы теории и практики изучения русского языка: Межвузовский сб. науч. тр. Краснодар, 1997. С. 340.

4. Василенко И. А. Сложные предложения в современном русском языке. Автореф. дисс. ... докт. филол. наук. М., 1958.

5. Гагкаев К. Е. О языке и стиле Коста Хетагурова. Орджоникидзе, 1957; Комаева Р. З. Слово и образ. Орджоникидзе, 1987; Бичегкуева О. Д. Имя собственное и художественный контекст. Владикавказ, 1998; Князева В. Н. Художественная образность публицистики Коста Хетагурова // Лингвометодические заметки. Владикавказ, 2007. Вып. 2; Князева В.Н. Особенности публицистического стиля Коста Хетагурова // Современные научные технологии: Сб. статей и тезисов. Владикавказ, 2007.

6. Джусойты Н. Коста Хетагуров. Очерк творчества. Сталинир, 1958; Салагаева З. М. Коста Хетагуров и осетинское народное творчество. Орджоникидзе, 1959; Хадарцева А. А. Творческая история «Осетинской лиры».Орджоникидзе, 1955.

7. Усманова Е. Г. К вопросу о сложных многочленных предложениях в современном русском языке (обзор литературы вопроса) // Наука - ВУЗ - Школа: Сб. науч. тр. Магнитогорск, 1998.

8. Хетӕгкаты Къоста. Равзӕрст уацмыстӕ. Орджоникидзе, 1989.

 

Просмотров: 554 | Добавил: Редактор | Дата: 26 Февраля 2024 года.
Друзья сайта
Президент РЮО
Правительство РЮО
Парламент РЮО
МИД РЮО
Посольство РФ в РЮО
Представительство Россотрудничества в РЮО
Международная ассоциация преподавателей русского языка и литературы
Координационный совет общественных организаций российских соотечественников
в Южной Осетии

Газет "Хурзæрин"
Газета "Южная Осетия"
"Sputnik - Южная Осетия"
ИА "Рес"
МИА "Южная Осетия сегодня"


Календарь
«  Декабрь 2019  »
ПнВтСрЧтПтСбВс
      1
2345678
9101112131415
16171819202122
23242526272829
3031
Архив записей